በምሥራቅ ወለጋ በአማራ ብሔረሰብ አባላት ላይ አደጋ እንዳንዣበበ እየተገለፀ ነው

“ሁሉም የጦር መሣሪያ ታጥቀዋል። ሴቱም ወንዱም ታጥቋል። ገበያ ሳይቀር መሣሪያ ታጥቀው ነው የሚመጡት። የቦታውን የኦሮሞ ታሪካዊ ስም ወደአማርኛ ቀይረዋል። የይዞታ ቦታቸውን እያስፋፉ ነው። የኦሮሞን መሬት እየወረሩ ነው” በሚል በኦሮሞ ሚዲያ ኔትወርቅ ላይ የቀረበው ዘገባ በአካባቢው ማንነትን መሠረት ያደረገ አደጋ ለመጣል ያሰበ አካል እንዳለ ማሳያ ነው ሲሉ የአደባባይ ምንጮች ይገልጻሉ።

“የወረዳው አስተዳደርም የመሣሪያ ምዝገባ ማድረጉን ገልጾ ነገር ግን ሙሉ በሙሉ ተመዝግቧል ብሎ እንደማያምን ጥርጣሬ እንዳለው” በOMN መገለጹ የአካባቢው መንግሥታዊ አስተዳደር ማንነት ላይ ያነጣጠር ጥቃት ሲጀመር የነዋሪውን ደኅንነት ላያስጠብቅ ይችላል የሚል ሥጋት ላይ የሚጥል መሆኑን የአደባባይ ወቅታዊ ጉዳዮችን ተከታታይ ባለሙያዎች ይገልጻሉ።

ይህ አካሄድ ሕዝብን ለግጭት ቀድሞ የመቀስቀስ፣ “ሠፋሪ” ያሉትን የአማራ ህዝብ ለቀጣይ ጥቃት የማጋለጥ እና የእልቂት ዋዜማ እንደሚመስል፣ የማንመልሰው ጉዳት ከደረሰ በኋላ ከማዘንና ከማልቀስ በፊት ችግሩ ከመከሰቱ ቀድሞ የተጠናከረ እርምጃ መውሰድ እንደሚገባ ባለሙያዎቹ አስጠንቅቀዋል።