ጣሊያን ሰልፍ አስተናግዳለች

አባቶች የማጽናኛ ቃልና ምክር ለሕዝብ በመስጠት፣ በጋራ ዝማሬ በመዘመር፣ በጣልያንኛ ቋንቋ የተዘጋጀ የአቋም መግለጫ እና የተለያዩ መፈክሮች በህብረት አሰምተዋል። የጣልያን ፓርላማ ጽ/ቤት ፊት ለፊት የተደረገው ሰላማዊ ሰልፍ በተያዘለት መርሐ ግብር መሠረት ቀጥታ ወደ ፓርላማው ጽ/ቤት በመግባት በጣልያንና በአካባቢዋ ሀገረ ስብከት ሊቀ ጳጳስ ብፁዕ አቡነ ሕርያቆስ የተጻፈውን ደብዳቤ በተወካዮች በኩል ለፓርላማው ጽ/ቤት አቅርበዋል።

ከደብዳቤው በተጨማሪ ደብዳቤውን ሊሰጡ የገቡ ተወካዮች በኦርቶዶክስ ተዋሕዶ ቤተ ክርስቲያን ላይ እየደረሰ ያለውን ችግር በቃል በማብራራት አስረድተዋል። ጽሕፈት ቤቱም በአፋጣኝ ለሚመለከተው አካል እንደሚያሳውቅ ገልጾ ተጨማሪ ቀጠሮ ለመያዝና የጉዳዩን ሂደት አፈጻጸም ለማስረዳት የቀጠሮ ቀን እንደሚያሳውቅ በመግለጽ ተወካዮችን በአክብሮት ሸኝቷል።

ይህንንም የፓርላማው ጽሕፈት ቤት ቆይታ በሰላማዊ ሰልፍ ለተገኙት ካህናትና ምእመናን ተገልጾላቸዋል። ፍጹም ሰላማዊ በሆነ መንገድ በሰልፉ ላይ የተያዘው መርሐ ግብር ሁሉ በተያዘው ሰዓት በጸሎት እንደተጀመረ በጸሎት ተዘግቶ በሰላም ተጠናቋል።